دلوقتي فيفي وسوسو وحتى تفيدة اتجوزوا.. وإنتِ يا عيني الوحيدة اللي بتعاني من الوحدة.. وبتضايقك جدا تعليقات صحباتك البنات بخصوص "مش ناوية قريب؟" و"يلاّ عاوزين نحضر فرح" و"إنت آخر واحدة ماتجوزتش في الشلة إمتى نخلص منك بقى أكيد لما بتسمعي التعليقات اللطيفة دي، بييجي على دماغك سؤال.. يا ترى فيفي وسوسو وتفيدة أحسن مني في إيه؟ أجمل مني؟ أذكى مني؟ دمهم أخف من دمي؟ ويا ترى ليه إنت بقالك ييجي 60 سنة مش عارفة تدخلي في علاقة عاطفية جادة؟ وليه يأستي لدرجة إن عندك استعداد ترتبطي بأي حد والسلام؟ احنا هنا بنقولك إن المشكلة بسيطة جدا، وكل اللي إنت محتاجاه للوصول للجاذبية اللي قدروا صحباتك البنات إنهم يوصلوا ليها، هي إنك تعرفي نفسك.. وخلينا نفهم الموضوع واحدة واحدة
أولا لازم تكوني صريحة جدا مع نفسك.. وتعترفي بنقاط قوتك، و-الأهم من ده- تعترفي بنقاط ضعفك أو عيوبك.. وده طبعا مش بيكون سهل، لأن مفيش حد تقريبا يحب إن تكون عنده عيوب أو "ديفوهات" في شخصيته.. ولو سألتيني "ده هيساعدني إزاي في إني أدخل علاقة عاطفية؟" هاقول لك إن مجرد معرفتك بالنقاط دي هايديكي ثقة أكثر في نفسك، وتحكُّم في العيوب دي وهيعلمك ازاي تخليها ماتأثرش في علاقاتك بالناس وهتخليكي كمان تقدري تستوعبي ازاي العيوب دي ممكن تؤثر سلبياً في وجهة نظر أي حد بيحاول يقرب لك على المستوى الإنساني والعاطفي، وخلينا نشوف المثال ده
*******
أحمد: ويا ترى إنتي بتحبي تقضي وقت فراغك في إيه؟ نانا: في الحقيقة أنا باحب أعمل شوبينج قوي.. باحب اشتري ماكياج كتير وأبقى نازلة أتفرج على المحلات عادي ألاقي نفسي اشتريت 4 إيشاربات مثلا وإكسسوارات وأدوات ماكياج وارجع أستلف من ماما لحد آخر الشهر طبعا نانا هنا كانت بتتكلم براحتها وبالتفصيل الممل، من غير ما تعرف إن ده عيب قاتل في شخصيتها. وطبعا أحمد بيفكر في حاجة واحدة اللي هي "الحمد لله إني عرفت الكلام دلوقت أحسن لو كنت اتجوزتها كانت خربت البيت وموتتنا من الجوع في الحالة دي إحنا مش بنطلب من نانا إنها تكذب وتخبي حقيقتها على أحمد، إحنا بنطلب منها إنها تعرف إن اللي بتقوله ده يندرج تحت عيب "التبذير وصرف الفلوس من غير وعي"، ولما تعرف إنه عيب هتحاول تصلحه بقدر الإمكان بإنها تتحكم في رغبتها المحمومة في الشراء على الفاضي وعلى المليان.. وبالتالي، لما تييجي تحكي لأحمد عن موضوع الشوبينج بتاعها ده، هتكون فاهمة إن ده عيب في شخصيتها، مش هتتفاخر بيه زي ما عملت في الحوار اللي فات
******* من انتى؟
مهم جدا إنك تعرفي نفسك وتكوني صديقة نفسك الأولى.. والإجابة على أشهر سؤال في تاريخ السينما المصرية "من أنت؟" بتاع "سعاد حسني" في فيلم (خلي بالك من زوزو).. شيء صعب مش سهل.. لأن جواه تفاصيل كتير.. يعني إيه من أنا؟ طب ما هو "أنا" ده عبارة عن كذا شخصية.. عبارة عن ابنة وأخت وطالبة وممكن فنانة.. إلخ.. إيه المقصود بأنا؟ اسمي؟ ديني؟ وظيفتي؟ دوري في عيلتي؟ دوري مع أصحابي؟ الحصول على إجابة السؤال ده محتاجة الكثير من التأمل والبحث جواكي
*******
لو أنا مش باحب نفسي، مين هايحبني؟
قلنا إن من أهم الصفات اللي لازم تتحلي بيها هي الثقة بالنفس.. والثقة بالنفس دي هاتيجي من معرفة إجابة سؤال "من أنتِ؟"وزي ما قلنا.. الثقة بالنفس يعني إنك تتقبلي نفسك بكل ما فيها.. بكل المميزات وبكل العيوب بصفتها شيء إنساني جدا ولأن الكمال لله وحده.. وخلي بالك.. لو إنت عمالة تبيني للناس إنك رائعة وفظيعة ومحصلتيش وإنك أحسن حاجة حصلت بعد بناء السد العالي، وإنت من جواكي مش مؤمنة بده ومؤمنة بإنك -مثلا- أتخن من اللازم أو مش ذكية قوية أو ماتستحقيش حبا حقيقيا.. ثقي تماما إن الناس هتعرف ده، وهتبعد عنك ومن ضمنهم قد يكون فارس أحلامك
